Humingi ng paumanhin si Vaccine Czar Carlito Galvez sa kanyang naunang pahayag na ginagamit ng Senado lamang sa pamumulitika ang pagdinig sa COVID-19 vaccination program ng pamahalaan.
Ito ay matapos makipagpulong si Galvez sa mga senador noong Miyerkules ng gabi.
Ayon kay Galvez, kanyang naipakita sa mga senador ang masigasig at maingat na hakbang ng pamahalaan sa pagkuha o pagbili ng suplay ng bakuna kontra COVID-19.
Nagpapasalamat din aniya siya sa pag-unawa ng mga senador sa umiiral na non disclosure agreement sa pagitan ng pamahalaan at mga manufacturers hingil sa presyo ng bakuna.
Kaugnay nito, umaasa si Galvez na mas magiging kaaya-aya na ang kanyang susunod na pagdalo sa pagdinig ng senado at pinabulaanan ang ulat na magwa-walk out siya.
