Aminado si Sen. Christopher “Bong” Go na hindi kakayanin ng Pilipinas ang kagaya ng sitwasyon ngayon sa India.
Dahil dito, nanawagan sa publiko si Go na palaging sundin ang health protocols na ipinatutupad ng gobyerno para maiwasan ang pagkalat ng coronavirus disease 2019 (COVID-19).
Ani Go, hindi kinakaya ngayon ng healthcare system ng India ang napakaraming kaso nila ng COVID-19.
Kaya aniya dapat tandaan ang pagkakaroon ng disiplina at palagiang pagsunod sa pagsusuot ng face mask at face shield, pagobserba sa physical distancing at hindi paglabas ng bahay kung hindi naman mahalaga ang gagawin.
Kaugnay nito, sinabi ni Go na nagpapatuloy ang gobyerno sa pagsisikap na makakuha ng karagdagang suplay ng bakuna kontra COVID-19.
