Patuloy na nadaragdagan ang mga grupong sumusuporta sa Uniteam tandem nila dating Sen. Ferdinand Bongbong Marcos Jr. at Davao City Mayor Sara Duterte para sa 2022 National Elections.
Ito’y makaraang maghayag na ng kanilang suporta sa Uniteam ang Filipinos for Peace, Justice and Prosperity Movement o FPJPM gayundin ang liga ng mga Beki sa Pilipinas at nangakong makalikom ng may 3 milyong boto.
Ayon kay Joseph Cadsawan, Chairman ng FPJPM, kailangan ng bansa na magkaroon ng isang bagong pinuno na makapanunumbalik sa disente, masigla at matalinong pamamahala.
Naniniwala rin ang grupo na ang pagkapanalo ng BBM-Sara tandem ang siyang makapagbibigay sa bansa ng panibagong pagasa at mula sa anila’y pagkatulala ng nakalipas na administrasyong Aquino.
Una rito, inihayag din ng grupo na kanilang sinuportahan si Marcos Jr. nang pumalaot ito sa kaniyang kandidatura nuong 2016 Vice Presidential race.
Maliban sa BBM-Sara tandem, suportado rin ng grupo ang ilang Senador mula sa iba’t ibang partido tulad nila JV Ejercito, dating Defense Sec. Gibo Teodoro, Loren Legarda, Larry Gadon, Sherwin Gatchalian at Migz Zubiri.
