Sugatan ang isang security guard ng SM Megamall sa Mandaluyong City matapos mabundol at sagasaan ng isang SUV na kanyang pinatigil habang nagmamando ng daloy ng trapiko.
Naganap ang insidente sa kanto ng Megamall at Saint Francis Square kahapon na nakunan ng video at ipinost sa Facebook ng netizen na si Chris Soriano, na kasamahan ng biktima sa raptor security agency.
Sa naturang video, isang puting toyota RAV 4 na may plakang NCO-3781 ang pinatigil ng hindi pa pina-pangalanang guwardya pero sa halip na huminto ay binundol ang biktima at sinadyang sagasaan.
Agad namang may rumespondeng ambulansiya sa biktima na nagtamo ng mga pasa, gasgas at bali sa katawan.
Pinaghahanap na ng Mandaluyong City Police ang driver ng nabanggit na sasakyan.
