Humigit kumulang 1,500 job vacancies ang inansunsyo ng Philippine Overseas Employment Agency (POEA) sa mga nag nanais magtrabaho sa ibang bansa. Sa panayam kay POEA Director Atty. Rosemarie Duquez sa programang Balita Na Serbisyo Pa ng himpilang DWIZ kamakailan, sinabi niya na bukod sa Saudi Arabia, may mga job opening rin para sa mga Pilipinong gustong magtrabaho sa Germany, Japan, Taiwan at Canada. Ilan sa mga nakapost sa website ng POEA ay ang mga job vacancies katulad ng 300 nurses para sa bansang Germany, 24 machine operators para sa bansang Taiwan, 200 female special dental Assistant sa Saudi Arabia, 50 factory workers sa Taiwan, 360 female nurses, 40 respiratory therapist, 20 female electrophysiology technician, at 300 female midwife para pa rin sa bansang Saudi Arabia.
Ayon pa kay Atty. Duquez, maaring magregister ang mga aplikante sa POEA website upang mas mapabilis at maka iwas din sa mga illegal recruiters. Matatagpuan din sa POEA website ang mga rehistradong recruitment agencies at mga available job orders.
Pinayuhan din ni POEA Dir. Atty. Duquez ang mga job seekers na direkta ring makipag ugnayan sa kanilang tangapan upang mas mabigyan ng payo at ayuda.
By: Robert Eugenio
