Dinampot ng PNP special action force ang siyam na miyembro umano ng ISIS inspired Dawlah Islamiya Maute Group sa kasagsagan ng engkuwentro sa Batangay Paigoay, Pagayawan sa Lanao Del Sur.
Ayon sa PNP SAF kay PNP Chief Guillermo Eleazar isisilbi lamang sana nila ang arrest warrant sa 43 anyos na lider ng DI – MG na si Faharudin Satar alias Abu Zacaria nang paputukan sila ng mga terorista dahilan kaya’t gumanti sila at pinaulanan din ng bala ang mga ito.
Kinilala ang mga naaresto na sina Camaroden Tindug, Sabdullah Sarip, Oetr Macaungun, Asnare Alisood Dima, Sowaib Abdullah, Saaduden Adapun, Zaenal Abdulatip at Aleem Salih Pitiilan.
Nakatakas naman sa nasabing operasyon ang dalawa pang teroristang sina Abu Dimam at Abu Khalifa.
Nakumpiska sa mga suspek ang isang carbine, dalawang M25 rifles, tatlong magazine, dalawang caliber 45 pistol, dalawang base radios, labing tatlong cellphone, isang laptop at mga subersibong dokumento.
