Inamin ni House Speaker Pantaleon Alvarez na mayruon siyang girlfriend bukod pa sa kaniyang ikalawang asawa.
Kasunod na rin ito ng mga batikos na nawala na ang moral high ground ni Alvarez sa usapin matapos mabunyag ang relasyon niya sa iba pang babae.
Sinabi ni Alvarez na kahit kailan ay hindi naman niya binatikos si Senador Leila de Lima sa naging relasyon nito sa kaniyang dating driver na si Ronnie Dayan at tanging ang binabatikos niya ay pagkakasangkot ng Senadora sa iligal na droga.
Nilinaw ni Alvarez na hiwalay na sila ng kaniyang ikalawang asawa at hindi aniya sila nag uusap nito kahit pa tumatayo itong pinuno ng Congressional Spouses Foundation Incorporated.
Lumutang ang isyu sa girlfriend ni Alvarez matapos niyang kasuhan ng graft ang kapwa kongresistang si Antonio Floirendo kaugnay sa paggamit ng kumpanya nitong TADECO sa bahagi ng lupain ng Davao Penal Colony.
Magugunitang kinilala ni Cathy Binag, girlfriend ni Floirendo ang kasintahan ni Alvarez na si Jennifer Maliwanag Vicencio na kaniyang nakaalitan sa Masskara Festival sa Bacolod City nuong isang taon.
By: Judith Larino
