Nakatakdang mag-deploy ng karagdagang tauhan ang PNP-Highway Patrol Group para tumulong sa pagmamando ng trapiko sa susunod na Huwebes, Enero 25 para sa selebrasyon ng ika-30 anibersaryo ng EDSA People Power.
Ayon kay PNP-HPG Director Chief Superintendent Arnold Gunnacao, partikular na tututukan ng mga dagdag nilang tauhan ay ang trapiko bago dumating sa Santolan, Ortigas at maging sa mga kalsadang palabas at papasok ng EDSA malapit sa White Plains.
Nakatakda kasing isara sa susunod na Huwebes ang EDSA Northbound ng Ortigas hanggang Santolan at White Plains simula alas-12:01 ng madaling araw hanggang alas-3:00 ng hapon para sa paggunita ng EDSA People Power.
Ang dagdag na 50 HPG personnel ang tutulong sa mahigit 200 tauhan ng HPG na matagal nang nagmamando ng trapiko sa EDSA.
Pinayuhan naman ang mga motorista na iwasan na ang mga nabanggit na kalsada para hindi maabala ng matinding traffic.
* Report from: Jonathan Andal
