Tutukuyin pa ng mga awtoridad kung mayroon pang iba pang kasabwat ang sinasabing nasa likod ng pagbebenta ng vaccine slot na si Kyle Bonifacio.
Ayon kay Metropolitan Manila Development Authority (MMDA) Chairman Benhur Abalos, masusing iimbestigahan si Bonifacio hanggang sa matukoy kung may iba pa itong kasama o siya lang mag-isa ang gumagawa nito.
Una rito, sinabi ng Mandaluyong Police na batay sa inisyal na imbestigasyon, lumalabas na mayroong kausap si Bonifacio sa social media na nag-aalok umano ng coronavirus disease 2019 (COVID-19) vaccine.
Sa ngayon ay patuloy na nangangalap umano ng ebidensya ang mga pulis at National Bureau of Investigation (NBI) na magpapatunay na dapat sampahan ng kaukulang kaso si Bonifacio.
