Naniniwala ang isang grupo na maglilipatan sa kampo ni Davao City Mayor Rodrigo Duterte ang mga miyembro ng ibang partido pulitikal sakaling magpasya itong tumakbo sa 2016 presidential elections.
Sa panayam ng DWIZ, isiniwalat ni Kapitan Mar Masanguid, Founder at Pangulo ng Duterte for President 2016 Movement, lihim na nakikipagpulong si Duterte sa ilang partido at may mga napipisil na itong mga kandidato na maaaring isama sa kanyang senatorial ticket.
Ayon kay Masanguid, ipinahiwatig ni Duterte na tanging pamilya na lamang ng alkalde ang tumututol sa kanyang posibleng pagtakbo sa susunod na taon.
“Iba na ngayon ang sinasabi ni Mayor. Hinahanap si Mayor ng mga botante, yung ibang kandidato naghahanap ng mga botante. Wala na syang magawa dahil yung mga tao galit na galit na, magtatampo yung mga tao kung matagal pa syang magde-declare,” paliwanag ni Masanguid.
By: Jelbert Perdez | Balitang Todong Lakas
