Nilinaw ni senior deputy majority leader at Ilocos Norte 1st District Rep. Sandro Marcos na ‘fake news’ ang kumakalat sa social media na kanya umanong sinabi na gumamit ng puting sibuyas kung mahal ang pulang sibuyas.
Ito’y matapos i-share sa social media ni dating Ifugao Rep. Teddy Baguilat at sinamahan pa ng komento.
Sa nasabing quote card, may mukha pa ito ni Marcos at logo ng isang media network na nakasaad na ‘simpleng solusyon kung mahal ang presyo ng red onions, pwedeng gumamit ng white onions’.
Gayunman, itinanggi ito ng Presidential son at nilinaw na wala siyang pahayag kaugnay sa presyo ng sibuyas.
Samantala, humingi na ng paumanhin si Baguilat kay Marcos maging sa mga netizen at ipinanawagan sa publiko na dapat maging maingat sa pagbabahagi ng mga impormasyon. –-mula sa panulat ni Jenn Patrolla
