Sarado sa trapiko ang ilang mga kalsada sa Metro Manila ngayong weekend.
Ito ay ayon sa Department of Public Works and Highways (DPWH), upang bigyang daan ang naka-schedule na pagkukumpuni sa mga ito.
Batay sa abiso ng DPWH, sarado simula alas onse kagabi hanggang lunes, alas singko ng umaga ang south bound ng C-5 Road paglagpas ng Julia Vargas bago ang Lanuza Avenue at bahagi ng EDSA paglagpas ng Eugenio Lopez bago ang Scout Borromeo Street.
Gayundin ang northbound ng EDSA sa tabi ng Trinoma – ika-anim na lane mula sa Center Island at Batasan Road bago ang Congress North Gate – harapan ng Quezon City Polytechnic University.
Samantala, nagsimula na rin alas diyes kagabi ang isinasagawang pavement restoration ng Manila Water sa ilang bahagi ng C-5 Road southbound na tatagal hanggang alas kuwatro ng umaga sa Lunes.
