Isasailalim sa granular lockdown ang ilang bahagi ng lungsod ng Mandaluyong.
Ayon sa Mandaluyong Public Information Office, kabilang sa mga ila-lockdown ang zones 4, 5, at 9 sa block 41, Barangay Addition Hills.
Sisimulan ang naturang granular lockdown ganap na alas-12 ng madaling araw ng Marso 12 at magtatagal hanggang Huwebes sa susunod na linggo o Marso 18 ganap na alas-12 ng madaling araw.
Sang-ayon sa EO number 32 ni Mayor Carmelita Abalos, habang umiiral ang paghihigpit, hindi papayagang makalabas ng kani-kanilang kabahayan ang mga residente nito.
Ito’y maliban na lamang kung medical emergency o isang APOR o authorized persons outside of residence ang isang residente.
Kasunod nito, magsasagawa ng contact tracing at COVID-19 testing ang pamahalaang lungsod para sa mga residente ng nabanggit na mga lugar na sasailalim sa granular lockdown.
