Tinukoy na ng Philippine Military Academy o PMA ang pangalan ng ilang kadeteng sangkot sa hazing na ikinamatay ni Cadet 4th Class Darwin Dormitorio.
Kinilala ang mga ito na sina Cadet Third Class Shalimar Imperial at Cadet Third Class Felix Lumbag samantalang mayroong direct participation sa hazing si Cadet First Class Axl Rey Sanupao dahil ito umano ang pasimuno ng pananakit kay Dormitorio.
Sinabi ng pamunuan ng PMA na bukod sa kaso, inalis na nila sa akademya ang mga naturang kadete.
Sinibak na rin sa PMA si Cadet Second Class Nickoel Termil dahil sa command responsibility.
Pinatawan naman ng suspension order sina Platoon Leader Cadet First Class Irvin Sayud at Commanding Officer Cadet First Class Elbert Lucas.
Si Cadet First Class Christian Correa naman ay nahaharap sa class 1 offense.
Ipinag utos na rin ng PMA ang pagsibak sa military personnel na sina Major Rex Bolo na siyang senior tactical officer at Captain Jeffrey Batistiana na siyang tactical officer.
Papatawan naman ng administrative charges sina Hospital Officers Coronel Cesar Candelaria na commanding officer at Captain Flor Apostol na siyang attending physician.
Una na ring nagbitiw sa puwesto sina PMA Superintendent Lt. General Ronnie Evangelista at Commandant of Cadets Brigadier General Bartolome Bacarro. — ulat mula kay Jaymark Dagala (Patrol 9)
