Kapwa tiwala sina Senador JV Ejercito at Richard Gordon na hindi maapektuhan ng usapin sa Dengvaxia vaccine ang appointment ni Health Secretary Francisco Duque.
Ayon kay Ejercito, tiyak namang makalulusot at masasagot ni Duque ang lahat ng katanungan ng mga miyembro ng CA o Commission on Appointment.
Aniya, wala namang anumang napa-ulat na nagawang iregularidad si Duque kahit noong pinuno pa siya ng GSIS at Civil Service Commission.
Naniniwala naman si Gordon na kwalipikado si Duque sa posisyon.
Dagdag ni Gordon, nakikipag-ugnayan din si Duque sa kanya upang humingi ng tulong mula sa Philippine Red Cross para sa mga batang nabakunahan ng Dengvaxia.
Posted by: Robert Eugenio
