Laglag sa kamay ng Southern Police District o SPD ang isang Indian national matapos maaktuhang nagbebenta ng ectasy at iba pang droga sa Makati City.
Kinilala ni Police Sr. Supt. Tomas Apolinario, Acting District Director ng SPD, ang suspek na si Aaron Nari Gidwani, 30-anyos, at residente ng Kalipayan Homes, Don Jesus Blvd., Barangay Cupang, Muntinlupa City.
Ayon kay Apolinario, huli sa akto umano si Gidwani habang inaabot sa isang poseur-buyer ang mga droga sa Burgos Street sa nabanggit na lungsod.
Tinatayang mahigit P25,000 halaga ng marijuana at ketamine o ecstacy ang nakumpiska nila mula sa nasabing dayuhan.
Isiniwalat ng SPD Director na ang naturang drug suspect ay hinihinalang nagbebenta ng party drugs sa mga high-end bar sa Rockwell, Makati Avenue at Bonifacio Global City o BGC sa Taguig City.
Inaalam pa ng SPD kung isa ang suspek sa mga supplier ng droga sa isang concert sa Pasay City na ikinasawi ng 5 katao.
By Jelbert Perdez | Jopel Pelenio (Patrol 17)
