Hindi nababahala ang Department of National Defense (DND) sa video na nagpapakita na pagre-recruit ng Chinese Navy.
Ayon kay National Defense Spokesman Peter Galvez, walang problema sa mensahe ng video kung ang sinasabing teritoryo ng Chinese military na nais nilang protektahan ay ang Mainland China.
Ngunit mali aniyang isipin ng China na kahit ang mga lugar na malayo sa kanila ay kabilang sa mga teritoryo nito.
Sa mahigit 4 na minutong video, nakasaad din na handa ang China na makipagdigma dahil hindi nito isusuko ni katiting ng kanilang mga yaman.
Tugon naman ni Galvez, itinatatwa ng Saligang Batas ng Pilipinas ang anumang may kinalaman sa digmaan o pakikidigma bilang instrumento ng polisiya kaya naman mapayapang paraan pa rin ang gagamitin ng Pilipinas sa pagharap sa mga isyu.
By Avee Devierte
