Tiniyak ng ilang senador na walang magiging epekto sa kanilang desisyon ang iringan ni Pangulong Rodrigo Duterte at Chief Justice Maria Lourdes Sereno kaugnay sa impeachment case ng punong mahistrado.
Ayon kay Senate President Pro Tempore Ralph Recto, titimbangin niyang maigi ang mga ihahaing ebidensya sa impeachment trial.
Dun niya umano ibabatay kung ano ang dapat na maging pasya sa impeachment proceedings na aniya’y isang lehitimong proseso.
Nilinaw din ni Recto na walang papel ang pangulo sa impeachment process bagaman may karapatan siyang manghimasok dito kung kanyang gugustuhin.
Samantala, tiniyak din ni Senador Chiz Escudero na merito at ebidensiya ang kanyang pagbabasehan sa impeachment case ni Sereno.
Sinabi ni Escudero na kanyang nirerespeto ang deklarasyon ng pangulo na kalaban na rin nito si Sereno gayunman ay wala pa rin siyang maaarig panigan sa dalawa.
Pinili namang hindi na magkomento nina Senate President Koko Pimentel, Senate Majority Leader Tito Sotto at Senador Ping Lacson.
Ito’y dahil anila, sila ang nakatakdang magbaba ng hatol sakaling matuloy at maiakyat ang articles of impeachment laban kay Sereno sa senado.
(with report from Cely Ortega- Bueno)
