Dinukot ng mga armadong lalaki ang hindi pa nakikilalang biktima na driver ng isang luxury car na BMW na inabandona nitong Huwebes ng madaling-araw sa Malate, Maynila.
Base sa inisyal na impormasyon, apat na kalalakihan ang dumukot sa biktima sakay ng dalawang sports utility vehicle (SUV).
Ayon sa nakasaksi, nakita niyang dinukot ng apat na suspek ang lalaking sakay ng BMW color gray na may plakang NDE 5943 saka mabilis tumakas papunta sa direksiyon ng P. Quirino Ave. sa Malate.
Sa pahayag ni Manila Police District Director P/Bgen. Leo Francisco, nang rumesponde ang mga tauhan ng MPD-Scene of the Crime Operatives ay naabutan nilang bukas ang audio system at umaandar ang makina ng BMW sa harapan ng Aristocrat restaurant sa may San Andres St. Corner, MH Del Pilar St.
Basag naman ang harapang salamin ng naturang sasakayan habang may gasgas ang bumper nito.
Bukod pa dito, napansin ding bukas ang dash cam na maaaring makapagbigay ng linaw o kasagutan sa makukuhang footage sa insidente.
Sa ngayon, patuloy ang imbestigasyon ng mga otoridad sa insidente habang nagsasagawa narin ng backtracking ang intelligence division. —sa ulat ni Aya Yupangco (Patrol 5), sa panulat ni Angelica Doctolero
