Natagpuang patay ang isang ‘di pa nakikilalang babae sa Lawton, Maynila.
Nakahandusay sa pagitan ng mga sasakyan ang katawan ng nasabing babaeng nakasuot ng puting t-shirt at gray na shorts, may taas na 5’4, at nasa 25 hanggang 35 taong gulang ang edad.
Nagtamo ang biktima ng matinding tama sa mukha na hinihinalang pinagpapalo ng matigas na bagay.
Ayon sa saksing si Mariana Gabriel, nakita niya ang biktima na nakikipagtalo sa isang lalaking malaki ang pangangatawan at nakasuot ng asul na damit at pantalon.
Kinaladkad, sinuntok, at sinakal pa aniya ito ng lalaki bago sila lumipat sa pagitan ng mga sasakyan.
Matapos ang ilang minuto ay nakita na lamang nilang wala nang buhay ang babae.
Kasalukuyan pa ring iniimbestigahan ng mga otoridad ang insidente.
By: Meann Tanbio
