Hinoldap ng apat na armadong lalaki ang isang hotel sa Pasay City kasama ang kanilang mga panauhin na kinabibilangan ng isang Overseas Filipino Worker.
Napagalamang pasado alas tres ng madaling araw ng Enero 2 nang mangyari ang insidente sa Mabuhay Manor Hotel sa FB Harrison, Pasay City. Nakuha di umano ng suspects ang tatlumpu’t tatlong libong pisong kita ng hotel.
Tinangay rin ng suspects ang mahigit sa labing limang libong dolyar mula kay Dominador Castro, isang OFW na nasa hotel kasama ang tatlong miyembro ng kanyang pamilya.
Maliban sa mga dolyar, nakuha rin di umano mula sa pamilya Castro ang mga gadgets na nagkakahalaga ng pitong libong dolyar, Rolex watch at mga alahas. Iniimbestigahan na ng Pasay police ang insidente.
Batay sa kuha ng CCTV, makikita ang panghoholdap ng apat na suspects sa mga panauhin sa lobby ng hotel.
Tumakas ang mga suspects, gamit ang itim na Hyundai Starex patungo sa direksyon ng Roxas Boulevard.
