Arestado ang isang lalaki matapos umanong kupitin ang natanggap na cash aid ng kanyang misis sa ilalim ng social amelioration program (SAP) sa San Jose City, Nueva Ecija.
Ayon kay alyas Edna, ninakaw ng kanyang kinakasama na si alyas Mon ang P6,500 na ayuda ng pamahalaan.
Inilaan ng gobyerno ang tulong pinansiyal para sa mga mahihirap na pamilyang sapul ng krisis dahil sa coronavirus disease 2019 (COVID-19).
Huli sa akto ang lalaki habang nakikipag-inuman sa Barangay Calaocan pero P3,000 na lamang ang narekober mula sa kanya.
Sasampahan ng kaukulang kaso ang naturang suspek.
