Patay ang isang pulis habang kritikal ang kasama nitong bente anyos na babae matapos pagbabarilin sa isang motel sa Pasig City.
Kinilala ang mga biktima na sina Josebel Polo at SPO2 Ernesto Sebastian Sanchez na nakatalaga sa drug enforcement unit ng Southern Police District.
Batay sa impormasyon ng Eastern Police District, pasado 11:30 kagabi, nasa loob na ng Country Lodge Hotel sa Pasig City ang sasakyan ng mga biktima nang biglang paulanan ng bala ng mga hindi pa matukoy na suspek na nakasakay noon sa isang AUV.
May bitbit na M16 rifle at shotgun ang mga suspek na nagwa pang madisarmahan ang mga guwardiya ng motel.
Ayon kay Pasig City Chief of Police Supt. Orlando Yebra, kabilang sa tinitingnan nilang anggulo sa krimen ay ang pagiging operatiba kontra droga ni Sanchez at ang love triangle.
