Nasawi ang isang sundalo matapos barilin ng mga hinihinalang miyembro ng NPA o New People’s Army sa Daraga, Albay.
Kinilala ang biktima na si Private First Class George Murillo, dalawampu’t pitong (27) taong gulang at residente ng Barangay Cumadcad sa Castilla, Sorsogon.
Ayon kay Albay Police Information Officer Senior Inspector Arthur Gomez, nasa palengke ng Barangay Ansilag si Murillo nang dumating ang mga rebelde at binaril ito sa ulo.
Matapos barilin si Murillo ay agad namang tinangay ng mga rebelde ang pera at service firearm nito.
Matatandaang noong nakaraang linggo ay dinukot naman ng mga miyembro ng NPA ang dalawang pulis sa Surigao Del Norte.
