Umapela ang isang grupo ng mga kabataan sa mga kandidato sa May 9 elections na tutukan ang mga isyung nakaapekto sa kanila gaya ng kakulangan sa trabaho at mababang pasahod.
Sinabi ni Errol Alonzo, National Chair ng young Christian Workers-Philippines na malaking problema ng mga kabataang pinoy ang regularisasyon sa kanilang mga trabaho.
Ani Alonzo, ang tanging regular na lamang ngayon ay ang mga aniya’y irregular jobs gaya ng 5-5-5, casual racket at project-based.
Kaya naman isinagawa nila ang young workers speak out festival kung saan inilatag nila ang kanilang mga agenda na dapat aniyang tutukan ng mga kandidato.
Giit ni Alonzo, silang mga kabataan ang pumapasan sa aniya’y mapang-abusong polisiya na ipinatutupad ng aquino administration gaya ng DOLE Executive Order number 18-A na nagpapahintulot sa konstraktwalisasyon.
By: Allan Francisco
