Matagumpay na naisagawa ang “Kababaihan Clean-up Drive” ng Brgy. Manggahan, Pasig City sa kahabaan ng Sampaguita St. Napico nitong ika-15 ng Marso, 2025.
Nabatid na ito ay parte ng pagdiriwang ng National Women’s Month na may temang “Babae sa Lahat ng Sector, Aangat ang Bukas sa Bagong Pilipinas”.
Sa pangunguna ni Kap. Quin Cruz, nilahukan ang clean-up ng mga kababaihan ng Sangguniang Pambaranggay at mga residente nito.
Sinasabing dumalo rin ang mga babaeng nominee ng Trabaho Partylist na sina Atty. Johanne Bautista at Ninai Chavez upang magbigay inspirasyon sa mga “Anak ng Manggahan” o residente ng Brgy. Manggahan lalo na sa mga kabataan at mga working mom.
Maliban sa pagsusulong ng patas na oportunidad para trabaho lalo na para sa mga kababaihan, determinado ang mga babaeng nominee ng Trabaho na palawigin pa ang mga benepisyo ng mga working mom, lalo pa kung sila ay solo parent, o maging PWD (person with disability).
Kasabay nito, nagpaalala naman ang barangay na ang pagkakalat ng basura ay ipinagbabawal ng Pasig City Ordinance No. 1 S. 2018 at Ecological Solid Waste Management Act. Magbabayad ng multang 1,000 hanggang 3,000 pesos at makukulong nang 30 araw sa ikatlong offense ang lalabag sa nasabing ordinansa.
