Lumagpas na sa 900 ang bilang ng mga gumaling na health workers matapos magpositibo sa coronavirus disease 2019 (COVID-19).
Batay sa pinakahuling tala ng Department of Health (DOH), 906 na ang kabuuang bilang mga nakarekober sa COVID-19 na mga health workers matapos madagdagan ng 61 kahapon.
Samantala, mayroon nang 2,311 mga health workers sa bansa ang nahawaan ng COVID-19.
Sa nabanggit na bilang, pinakamarami ang nurse na umaabot sa 841, sinundan ng doktor na 671, nursing assistant na may bilang na 144, 84 na medical technologists at 42 ang radiologic technologist.
Samantala nanatili naman sa 35 ang bilang ng mga nasawing health workers dahil sa COVID-19.
