Patuloy na patutunugin ang mga kampana sa mga simbahang sakop ng Archdiocese of Manila tuwing alas-8:00 ng gabi.
Ito ang inihayag ni Manila Archbishop Luis Antonio Cardinal Tagle kasunod na rin ng karumal-dumal na pagpaslang kay Fr. Mark Ventura sa Cagayan kamakailan.
Batay sa isang kalatas na ipinalabas ng kardinal, paalala aniya ang pagpapatunog sa mga kampana na huwag kalimutan na ipagdasal ang lahat ng mga pumanaw na dulot ng karahasan.
Panawagan din aniya ito upang mapanibago ang pagluluksa ng sambayanang Pilipino patungo sa pag-asa at kapayapaan.
Magugunitang sinimulan ng Archdiocese of Manila ang pagpapatunog sa kampana ng mga simbahang sakop nito noong Setyembre ng nakalipas na taon bunsod na rin ng sunud-sunod na patayan sa ilalim ng kampaniya kontra droga ng pamahalaan.
—-
