KALABOSO ang dalawang umano’y kubrador ng loteng matapos masakote ng mga elemento ng Quezon City Police District (QCPD) habang nagpapataya.
Sinasabing ikinasa ang operasyon bunga ng malawakang kampanya ng QCPD laban sa lahat ng uri ng ilegal na sugal kasunod na rin ng kautusan ni District Director Remus Medina.
Kinilala ang mga suspek na sina Joselito Agno at Eric Daniel na naaktuhan ng mga operatiba habang tinatanggap ang taya sa pamamagitan ng GCash kasama ang PNP Anti-Illegal Gambling Task Force.
Sa ulat ni PLtCol. Melgar Devaras ng District Special Operations Unit (DSOU) na isinumite kay Medina, nahuli ang dalawa sa kanto ng Road 20 at Pariñas St. sa Barangay Bahay Toro, Project 8, kamakailan sa nasabing lungsod.
Ayon sa tanggapan ni Medina, dumagsa ang report sa DSOU mula sa mga residente ukol sa umano’y lantarang operasyon ng loteng.
Nakatakdang sampahan ng kaukulang reklamo ang mga naturang suspek.
