Bigo pang makapaglabas ng warrant of arrest kahapon ang Makati City Regional Trial Court (RTC) Branch 148 kaugnay ng kasong kudeta na isinampa laban kay Senador Antonio Trillanes IV.
Ito’y makaraang ipagpaliban muna ni Judge Bartolome Soriano ang paglalabas ng desisyon matapos ang halos walong oras na pagdinig.
Sa naging pagdinig kahapon, naglatag ng kanilang mga ebidensya at testigo ang magkabilang panig na isinailalim din sa eksaminasyon ng hukuman.
Kasunod nito, inatasan ang kampo ng senador na maghain ng formal offer of exhibits sa loob ng limang araw o hanggang oktubre 9 at saka naman hihingan ng komento ang panig ng prosekusyon.
Sakaling maisumite na ang mga hinihinging dokumento ni Judge Soriano, duon pa lamang nito sisimulan ang pag-aaral at desisyon kung kakatigan o hindi ang hirit ng Department of Justice (DOJ) na maglabas ng warrant of arrest laban kay Trillanes.
