Patuloy na nagtitiwala sa pamumuno ni Pangulong Ferdinand Marcos Jr. ang karamihan sa mga Pilipino.
Sa isinagawang Tugon ng Masa survey ng OCTA Research para sa ikalawang quarter ng 2024, lumalabas na 71% ng mga Pilipino ang tiwala kay Pangulong Marcos. Mas mataas ito ng 2% kumpara sa 69% na naitala sa unang quarter ng taon.
Dagdag pa rito, tumaas din sa 68% ang performance rating ng pangulo, mula sa noo’y 65%.
Gayunman, nauna nang sinabi ni Pangulong Marcos na bagama’t magandang balita ang ganitong resulta ng survey, binigyang-diin niyang hindi ito batayan sa pagtatrabaho ng pamahalaan. Pagtitiyak niya, patuloy na tututukan ng pamahalaan ang pagpapabuti ng buhay ng mga Pilipino.
Samantala, bumaba naman sa 65% mula sa noo’y 68% ang trust rating ni Vice President Sara Duterte; gayundin ang kanyang performance rating na 60%, mula sa 64% na naitala noong unang quarter ng taon.