Laglag na sa kamay ng mga alagad ng batas ang 1 sa 7 suspek sa pamamaslang kay dating Batuan, Masbate Vice Mayor Charlie Yuson III.
Ayon sa BICOL PNP, naaresto ang kasalukuyang Vice Mayor ng nabanggit na bayan na si Nelson Cambaya sa bisa ng warrant of arrest dahil sa mga kasong Murder at Frustrated Murder.
Batay sa impormasyon, natunton si Cambaya sa pinagtataguan nito sa Brgy. Quinapagian, bayan ng Mercedes, lalawigan ng Camarines Norte.
Kasalukuyang hawak ng Mercedes Municipal Police Station si Cambaya kung saan, walang inirekumendang piyansa sa mga kinahaharap niyang asunto para sa pansamantala niyang kalayaan
Maguginitang pinagbabaril habang kumakain ng almusal si Yuson sa harapan ng isang bahay sa Vicente Cruz st., Sampaloc, Maynila noong ika-19 ng Oktubre 2019 kung saan, 2 sa mga kasama nito ang sugatan.
Maliban kay Cambaya, dawit din sa kaso sina Philippine Charity Sweepstakes Office o PCSO Board Member Sandra Cam, anak na si Marco Martin gayundin sina Junel Gomez, Bradford Solis, Juanito de Luna at Rigor dela Cruz.
Nagpasalamat naman si PRO 5 Director P/BGen. Jonnel Estomo sa mga nagturo ng kinaroroonan ni Cambaya at nangakong hindi tatantanan ang pagtugis sa iba pang nakalalayang suspek.
