Sinampahan ng kasong child abuse at cyber crime ang aktres na si Ellen Adarna ng ina ng 17 anyos na batang pinaghinalaan nitong kumukuha ng video habang kumakain sa isang Japanese Resto sa Makati.
Inihain ng ina ng nasabing dalagita na si Myra Abo Santos ang reklamo sa Office of the City Prosecutors sa Pasig City.
Magugunitang, nag-ugat ang usapin nang magpost si Ellen ng video ng dalagitang nakilalang si Eleia na umano’y patagong kinukunan siya ng video at kanyang pang tinawag na Paparazzi.
Sinagot naman ito ng dalagita sa pamamagitan ng Twitter at iginiit na hindi niya napansin o kilala man lang ang aktres.
Dagdag pa nito, tanging ang kanyang pagkain lamang ang kanyang kinukunan ng video at photo.
Ilang araw naman matapos ang insidente, hiningan ng public apology ni ginang Santos si Ellen dahil sa pangyayari at binalaang sasampahan ito nang kaso.
