Nangako si Pangulong Rodrigo Duterte na isisiwalat ang katotohanan sa likod ng madugong operasyon ng Philippine National Police – Special Action Force (PNP – SAF) sa Mamasapano Maguindanao, may tatlong (3) taon na ang nakalilipas.
Ayon kay Presidential Spokesman Harry Roque, nananatili pa ring mailap ang katarungan para sa pamilya ng SAF 44 na nagbuwis ng buhay dahil sa kapabayaan ng mga opisyal ng pamahalaan na nasa likod ng naturang operasyon.
Giit ni Roque, ayaw na ni Pangulong Duterte na maulit pa ang naturang trahedya kung saan napawawalang saysay ang buhay ng mga tinaguriang kawal ng bayan na laging handang maglingkod para sa sambayanang Pilipino.
Kasunod nito, nakiisa ang Malakanyang sa panalangin para sa mga nasawing SAF commandos at umaasa silang makakamit na ng pamilya ng mga ito ang matagal na nilang inaasam na katarungan.
