Patay ang konsehal ng Pasay City na si Borbie Rivera makaraang pagbabarilin ng mga hindi pa nakikilalang suspek sa SM Southmall sa Las Piñas City, Sabado ng gabi, Agosto 5.
Ayon kay S/Supt. Marion Balonglong, hepe ng Las Piñas Philippine National Police (PNP), pinagbabaril ng hindi pa tukoy na suspek ang biktima habang nakasakay sa wheelchair at naghihintay sa pintuan ng nasabing mall.
Agad nakatakas ang salarin makaraang gumanti ng putok ang kasama ni Rivera nang mangyari ang insidente at agad namang dinala sa ospital ang biktima ngunit hindi na ito umabot pa ng buhay.
Nabatid na hindi ito ang unang pagkakataon na tinambangan ang konsehal dahil pinagtangkaan na rin itong patayin noong Hunyo 23 ng taong kasalukuyan.
