Hiniling ng ilang mga grupong kontra sa anti-terrorism act sa korte suprema na magpalabas ng Temporary Restraining Order (TRO) laban sa pagpapatupad ng naturang batas.
Kasunod anila ito ng magkakasunod na insidente ng pag-aresto at patuloy na red tagging ng mga pulis at militar.
Ayon sa bagong alyansang makabayan o bayan at iba pang aktibistang grupo, matitiyak ang proteksyon sa basic rights kung magpapalabas ng preliminary injunction o TRO ang supreme court habang nakabinbin pa ang mga kaso laban sa anti-terror law.
Sa inihaing mosyon ng mga naturang petitioner, binanggit ng mga ito patuloy na pag-tag ng mga security officials sa ilang indibiduwal o grupo bilang komunista o terorista.
Tulad anila ng ginawa ni Lt. General Antonio Parlade Jr. Nang balaan ang aktres na si Liza Soberano sa pakikipag-ugnayan nito sa women’s group na Gabriela.
Sinabi rin ng mga petitioners na nakatanggap sila ng verified information hinggil sa pag-aresto, pagsampa ng kaso at pagpapakulong sa ilang mga indibiduwal batay sa anti-terrorism law bago pa man naipalabas ang IRR nito.
