Dumipensa ang palasyo matapos kuwestiyunin ang coverage ng Radio Television Malakaniyang o RTVM sa pag-upo ni Marinduque Rep. Lord Allan Velasco bilang bagong house speaker sa Celebrity Sports Plaza sa Quezon City.
Paliwanag ni Asst. Sec. Kris Ablan ng Policy, Legislative Affairs and Freedom of Information, hiniling ng House Of Representative noong Agosto ang presensya ng RTVM team sa Batasan para sa live coverage ng budget deliberations para sa 2021 General Appropriations Act.
Ani Ablan, habang naghahanda para sa muling pagbabalik ng sesyon ng kamara, inabisuhan ang RTVM crew na magtungo sa Celebrity Sports Plaza kung saan mayroong aktibidad umano si Velasco.
Nagmula umano ang request kay Deputy Majority Leader Bernadette Herrera-Dy.
Iginiit ni Ablan na walang kinalaman ang naturang coverage ng RTVM sa posisyon ng Presidential Communication Operations Office sa sitwasyong pulitikal sa kamara.
Layon aniya ng RTVM na makapaghatid ng mga tunay na impormasyon at transparency sa gobyerno.
