Patay ang isang hindi pa nakikilalang lalaki matapos umanong makipagbarilan sa mga pulis sa isang checkpoint sa Caloocan City.
Ayon sa mga pulis, nangyari ang insidente pasado alas 2:00 kaninang madaling araw nang papadaan ang may magkaangkas na motorsiklo sa bahagi ng Ilang-Ilang Street, Saranai Village, Barangay 171 Bagumbong.
Bigla anilang nag-u-turn ang motorsiklo matapos makita ang nakalatag na checkpoint.
Dagdag pa ng mga pulis na nakatalaga sa checkpoint, hinabol nila ang motorsiklo pero sa halip na tumigil ay bumaba ang back rider at nagpaputok umano ng baril.
Gumanti ng putok ang mga pulis at napatay ang salarin habang nakatakas naman ang nagmamaneho ng motor.
Narekober naman sa lugar ng insidente ang isang kalibre trentay otso baril na ginamit umano ng suspek.
Samantala, hinihinala naman ni Chief Inspector Michael Villanueva ng Criminal Investigation and Detection Group NCR, posibleng miyembro ng Epoy Robbery Hold Up ang mga nasabing salarin.
