Arestado ng mga tauhan ng Philipine National Police Anti-Kidnapping Group (PNP-AKG) ang isang lalaking sangkot sa pagpatay sa lalawigan ng Capiz.
Kinilala ni PNP-AKG Director P/Bgen. Jonnel Estomo ang suspek na si Marvin Sion na ika-siyam sa mga most wanted criminal sa nasabing lalawigan.
Nabatid na matagal nang nagtatago ang suspek bago ito makalaboso sa kaniyang tinutuluyan sa brgy. 712, Malate sa Maynila sa bisa ng warrant of arrest.
Nag-ugat ang kaso nang patayin ni Sion ang biktimang nakilalang si Rene Estominos sa Brgy. Nasunogan, Capiz noon pang Marso 2011.
Pinagsasaksak umano ng suspek ang biktima sa iba’t-ibang bahagi ng katawan ito na nagresulta sa agad niyang pagkamatay.
Kasalukuyan nang humihimas ng rehas na bakal ang suspek at isinailalim na sa kaukulang booking at documentation bago iharap sa korte na dumidinig sa kaniyang kaso.
