Isang pasyenteng lulan ng ambulansya ang patay habang labingdalawa (12) ang sugatan sa karambola ng anim (6) na sasakyan sa Barangay Santo Niño, Marikina City.
Kinilala ang nasawing biktima na si George Hitosis, 76-taong gulang na isusugod sana sa Amang Rodriguez Medical Center matapos mahirapan sa paghinga.
Ayon sa Marikina City Police, nasa kanto na ng Gil Fernando Avenue at Sumulong Highway ang ambulansya nang biglang salpukin ng isang Foton mini-dump truck na may plakang IO-A380.
Matapos nito ay nagkarambola na ang ambulansya, isang tricycle, dalawang single motorcycles at isang Mitsubishi Montero.
Arestado naman ang driver ng dump truck na kinilalang si Anthony Donayre, 36-anyos na nahaharap sa kasong reckless imprudence resulting in multiple physical injuries and damage to properties.
—-
