Isinailalim sa State of Calamity ang Macabebe, Pampanga.
Ito ay dahil sa malawakang pagbaha bunsod ng epekto ng habagat at bagyong Nimfa.
Batay sa resolusyong ibinaba ng Sangguniang Bayan, hindi na halos humuhupa ang mga pagbaha sa iba’t ibang lugar sa munisipalidad dahil sa patuloy na pag-ulan.
Dahil dito, hindi na rin halos madaanan ng lahat ng uri ng sasakyan ang mga pangunahing lansangan sa Macabebe.
Kaugnay nito, inaasahang magagamit na ng lokal na pamahalaan ang 30% ng kanilang Quick Response fund.
