Mahigit 37K fully grown Marijuana at aabot sa 26 at kalahating kilong pinatuyong dahon nito ang winasak ng mga operatiba ng Philippine National Police o PNP sa Kibungan, Benguet.
Ito’y ayon kay PNP Chief, Gen. Guillermo Eleazar ay kasunod ng nagpapatuloy na kampaniya ng PNP sa mga ipinagbabawal na plantasyon ng mga narcotic sa bansa.
Ayon sa PNP Chief, nagkakahalaga ng mahigit 10 at kalahating milyong piso ang mga winasak na halaman at pinatuyong dahon ng Marijuana sa Sitio Dalipey sa Brgy. Tacadang at Sitio Naptong sa Brgy. Badeo
Bagama’t bigo ang mga awtoridad na maaresto ang mga nangangalaga sa naturang pantasyon ng Marijuana, pinapurihan pa rin ng PNP Chief ang mga tauhan nito dahil sa matagumpay na pagwasak nila sa iligal na taniman.
Pagtitiyak pa ni PNP Chief Eleazar, hindi lang sila nakatutok sa bahagi ng Cordillera kundi maging sa iba pang plantasyon ng Marijuana sa iba’t ibang bahagi ng bansa.— ulat mula kay Jaymark Dagala (Patrol 9)
