Inatasan na ni Metro Manila Development Authority (MMDA) Chairman Danilo Lim ang kanyang personnel na mahigpit na ipatupad ang traffic policies sa gitna ng Christmas holiday rush.
Ayon kay MMDA Spokesperson Celine Pialago, mahigpit na ipinapaalala ni Lim ang “No Absent, No Day Off Policy” sa lahat ng mga tauhan nilang naka – deploy sa mga kalsada, bus terminal at mga critical area sa EDSA.
Hinimok din ni Pialago ang mga local government unit (LGU) na makipag – tulungan sa MMDA para sa clearing operations sa Mabuhay o Christmas lanes na pilit pa ring ginagawang parking space ng mga motorista.
Dakong 5:30 ng umaga ngayong Biyernes nang magsimula ang traffic buildup sa EDSA dahil nataong Pay Day at inaasahang magpapatuloy hanggang 11:00 ng gabi.
Isa sa mga rason ng pagsisikip ng daloy ng trapiko ay ang kaliwa’t kanang Christmas party at iba pang events bukod pa sa pagdagsa ng mga mamimili sa mga mall.
