Ipinakita ni Pangulong Rodrigo Duterte sa Filipino Community sa Singapore ang makapal na narco list na naglalaman ng mga pangalan ng opisyal, pulis at mga personalidad na sangkot at protector ng illegal na droga.
Sa kanyang talumpati sa mga Filipino sa Singapore, inihayag ng Pangulo ang ilang mga pangalan tulad nina Cebu Bantayan Mayor Vicente Loot, dating Albuera Leyte Mayor Rolando Espinosa Sr., at ang mag-asawang Melvin at Meriam Odicta sa Iloilo na nasa likod ng pagkalat ng illegal drugs sa bansa.
Galit na sinabi ng Pangulo na napakaraming adik sa Pilipinas na nasira ang pamilya dahil sa mga taong ito kaya hindi niya hahayaang magpatuloy ang transaksyon ng iligal na droga sa bansa.
Bago pumasok ang Enero 2017, sinabi ng Pangulo na matatanggap niya ang opisyal na report kung ilan na ang kabuuang bilang ng mga adik sa Pilipinas.
By: Meann Tanbio / Aileen Taliping
