Nanawagan ang Philippine National Police (PNP) sa mga may hawak ng impormasyon hinggil sa pagpatay sa isang pulis sa Bacolod City na lumantad at isiwalat ang kanilang nalalaman upang makatulong sa pagresolba ng kaso.
Ito’y kasunod ng ginawang pagpatay ng mga hindi pa tukoy na salarin kay PSSgt. Joseph Nepomuceno na nakatalaga sa Bacolod City Police Drug Enforcement Unit.
Kasabay nito, nagpaabot ng pakikiramay si PNP Chief P/Gen. Guillermo Eleazar sa pamilya ng 37 anyos na pulis at tiniyak ang kaukulang tulong na ibibigay para sa kanila gayundin ang katarungang dapat na mapasakanila.
Magugunitang pinagbabaril hanggang sa mapatay si Nepomuceno habang papasakay ng kaniyang motorsiklo noong araw ng Linggo, Agosto 29. —sa ulat ni Jaymark Dagala (Patrol 9)
