Hindi lamang “Plan B” mayroon si Department of Interior and Local Government (DILG) Secretary Mar Roxas sakaling ibasura ni Senador Grace Poe ang kanyang alok na maging running mate niya sa 2016 elections.
Sa isang ambush interview, sinabi ni Roxas na mayroon siya hanggang “Plan F” kung hindi man pumayag ang senador na maka-tandem niya sa halalan.
Ayon kay Roxas, maghihintay siya hanggang sa buwan ng Oktubre para sa magiging desisyon ni Poe.
Sinabi naman sa DWIZ ni Atty. Nelson Victorino, Chief of Staff ni Senador Grace Poe, mas mainam kung pag-usapan ito ng personal nina Poe at Roxas.
“Alam ko ang sabi niya eh mag-uusap na lang sila, mas gusto niya kasi kung ano man eh hindi ‘yung ganyan na itinapon sa TV o ano, ang alam ko ang pahayag niya diyan ay magkikita sila, magkaibigan naman sila, pag-usapan na lang nila ng masinsinan na dalawa para personal dahil hindi naman kung anong usapan lang ito medyo seryoso ito.” Paliwanag ni Victorino.
Bukod kay Poe, lumutang ang mga pangalan nina Camarines Sur Representative Leni Robredo at Batangas Governor Vilma Santos-Recto na maging running mate ng kalihim.
By Meann Tanbio | Kasangga Mo Ang Langit
