Nanatili pa ring positibo ang Pinay drug convict na si Mary Jane Veloso sa kabila ng kanyang pagkakakulong sa Indonesia.
Ayon kay Department of Social Welfare and Development (DSWD) Assistant Secretary Aleli Bawagan, sa kanyang pagbisita kay Mary Jane sa kulungan nito sa Wirogunan ay nakita niya ang pagsisikap pa rin nito para makapagpadala at makatulong sa kanyang pamilya.
Aniya, naglalaba si Mary Jane ng damit ng kanyang mga kasamahan sa selda at ibinibenta rin nito ang kanyang mga ginantsilyo at ginawang batik.
Katangi-tangi rin umano ang pagiging masayahin nito at positibo na nagbibigay ng pag-asa sa kanyang mga kasama sa selda.
Matatandaang ipinagpaliban ang pagbitay kay Mary Jane habang hinihintay ang pagdinig sa kaso laban sa recruiter nito dito sa Pilipinas.
By Rianne Briones
