Kinumpirma ng militar na pinugutan na ng mga Jihadist ang dalawa pang biktima na kabilang sa mga binihag ng mga ito sa Lanao del Sur.
Ayon kay Colonel Manolo Samarita, Deputy Commander ng 103rd Infantry Brigade ng Philippine Army, natagpuan na ang bangkay nina Salvador Hanobas alias Tado at Makol Hanobas alias Macky.
Ang dalawa ay dinukot noong Abril 4 kasama ang apat na iba pang sawmill workers na una nang pinalaya ng mga suspek.
Sinasabing pinatay ng Grupong Dawlah Islamiyah o Islamic State sa Lanao ang dalawa matapos na hindi mapagbigyan ang hirit nilang palayain ang isang 13-anyos na Jihadist na umano’y nadakip ng militar sa bayan ng Butig.
Iginiit naman ng mga opisyal ng militar at pulisya na walang Jihadist na naaresto ang kanilang grupo sa mga military operations sa naturang lugar.
By Jelbert Perdez
