Nasabat ng mga awtoridad sa Maynila ang aabot sa P80K halaga ng mga paputok.
Ito’y makaraang isagawa ng mga tauhan ng manila police station 3 ang isang oplan galugad sa kahabaan ng Carlos Palanca St., sa Sta. Cruz sa Maynila.
Mababatid na nakumpiska sa naturang operasyon ang 3,793 na piraso ng iba’t-ibang uri ng paputok sa suspek na si Editha Carlos.
Kabilang sa mga nasabat ay ang mga sumusunod: super jumbo fountain, jumbo alkansya fountain, sixteen shots fireworks, box luces, stick luces, baby rockets, at saturn missiles.
Bukod pa rito, may nakuha rin ang mga awtoridad ng nasa labingwalong bundle ng luces at kahun-kahong golden spinners sa kaparehong operasyon.
Mababatid na sang-ayon sa kautusan ng mga alkalde sa Metro Manila mahigpit na ipinagbabawal ang pagpapaputok para makaiwas sa anumang disgrasya at sa posibleng paglabag sa ipinatutupad na health protocols kontra COVID-19.
