Sinagot naman ng presidential daughter at Davao City Mayor Sara Duterte-Carpio ang birada laban sa kanya ni Senador Antonio Trillanes IV.
Ito’y makaraang sabihin ni Trillanes na pakipot lang umano sila ni Special Assistant to the President Bong Go sa pagtakbo sa 2019 senatorial elections.
Ayon sa alkalde, dapat tantanan na siya ni Trillanes kung ayaw nitong maubos ang kaniyang yaman sa mga kasong isasampa niya rito sa hinaharap.
Dapat din aniyang pakinggan ni Trillanes ang sinabi ng kaniyang inang si Elizabeth Zimmerman na wala umano siyang puso kaya’t dapat mag-ingat aniya ang senador sa pagbangga sa kaniya.
Pero agad tinuldukan ni Trillanes ang word war sa pagitan nila ni Mayor Sara at sinabi nitong hindi na niya papatulan ang alkalde dahil wala siyang oras.
Dahil dito, tinawag na duwag ng alkalde si Trillanes at kinuwestyon pa nito kung paano naging sundalo ang senador gayung isa naman itong duwag at kahihiyan ng sambayanang Pilipino.
—-
